زمرة الإرهاب

يا زمرة الإرهاب يا شلة الزيف
يا أهل العقول الحاقدة والحقيرة
وش عاد باقي كل تخريبكم شيف
بانت نواياكم وخبث السريرة
بأفعالكم حارت عقول العواريف
فعل تحير به العقول البصيرة
قتل وترويع وبغي وتخويف
وسفاكة للدم بأرض الجزيرة
إجرامكم يفوق كل التواصيف
لا دين لا رحمة ولا حق جيره
بأرض الخبر ذبحتوا الطفل والضيف
بفعل عليكم صار ذل ومعيره
وبينبع وجدة دموع ذواريف
على فعايلكم ونفس كسيره
وعلى رجال الأمن عدتوا مناكيف
تستهدفون أهل العيون السهيره
الدين واضح دون زود وتطفيف
هو ديننا والله ولا نريد غيره
يحفظه رب الكون عن كل تحريف
ويحماه عن كل النوايا الشريره
حنا تشرفنا بالاسلام تشريف
واللي مع الإسلام ربه نصيره
وأنتم خوارج ما عليكم تحاسيف
أوقضتوا الفتنة بنار سعيره
لكن عساكم وسطها يا الخواطيف
وتقضي عليكم يا الوجيه الغبيره
ويا مملكتنا انتي لنا الظل والريف
وانتي لنا الأم الحنون البريره
ولا يهمك هرج ناس ملاقيف
طوال الألسن والأيادي قصيره
ناسٍ تزيف كلمة الحق تزييف
خدامة لابليس تتبع مسيره
ما دامهم لابليس صاروا مواليف
ابليس خاب وخاب من يستشيره
يا مملكتنا عن جميع الصواديف
يحفظك من ساق المزون المطيره
أنتي مقرك فوق عال المشاريف
ما دام تحكمك الوجيه السفيره
الأمن راسخ رغم كل العواصيف
ويا الله عسى بالأمر خير وخيره
ويا فهد سل السيف لا تغمد السيف
واضرب به الإرهاب في كل ديره
اضرب به أهل الظلم والبغي والحيف
وأهل الفساد وكل ساقط عشيره
وظف عليهم شذرة السيف توظيف
واجعل جثثهم بالصحاري نثيره
حتى يطيع اللي برأسه زعانيف
لا شاف فصل السيف يصحى ضميره
نظف بلدنا من هل الغي تنظيف
وابشر بنصر لك يسوقه بشيره
لجل تعيش العيشة اللي على الكيف
ونحفظ بلدنا ونتهنى بخيره
يا فهد حنا لك سيوف مراهيف
اضرب بنا صم الصخر نستثيره
نحمي الوطن من حد نجران لطريف
واللي نواه بسو نلعن مريره
ونحمي عقيدتنا من أهل التخاريف
ودستورنا القرآن منهج وسيره
ثم الصلاة عداد وبل المهاتيف
على النبي اللي تبعنا مسيره
عطا الله بن سليمان العطا الله