بعض ملحك

للمدينة وجه يضحك ساعة اضحك
واشعر ان لها يدين وتحتضني
عذبة لا من طرى لي حلو مزحك
بادلتني النشوة وقامت تغني
كل ما يحلى بها من بعض ملحك
ذي قناعاتي ولا هو بس ظني
لكن ان جار الظلام وغاب صبحك
ذقت خلف دروبها مر التمني
تدري انت ان الحنين جنون رمحك
ينغرس في خافقي لا غبت عني
لا تدور لي عذر ويطول شرحك
قلتها وأعيدها لسمعك وأثني
حتى لو يغتالني في صمت جرحك
يشفع بموتي غلاك اللي سكني
وبين نزعات العتب وغرور مدحك
تلبس الحيرة كتاباتي وفني
واتساءل كم خساراتي وربحك
دامني منك حبيبي وانت مني
يا يباس الغصن لو ما هب نفحك
والوعد لو ما عطى الفرصة غبني