مملكتنا مكرمتنا

يا هجوس الشعر هاتي وانثري حلو القصيد
وفي سما الابداع لوحي فوق هامات السحاب
غردي لي بالبيوت اللي كما الدر النضيد
واصدحي للمملكة في معانيك العذاب
يحفظ الله مملكتنا اللي محبتها تزيد
مملكتنا مكرمتنا ما بها شي يعاب
يوم حاضرها المجيد وعقب ماضيها التليد
آمنين في سهلها وفي وعرها والهضاب
وعزنا بحكامنا اللي باسهم باس شديد
عزنا منهم وفيهم وهم يوفون النصاب
الحكم لله وثم اللي لهم مجد فريد
أسرة لها انتسبنا ونفتخر بالانتساب
الحكم لآل السعود ودايم فيهم نشيد
وبيننا وما بينهم ما فيه بواب وحجاب
قادنا الشهم المحنك قادنا الرجل الرشيد
أبو فيصل نعم والله فيه حلال الصعاب
أشهد أنه بالسياسة والرياسة ما يبيد
السياسة لعبة له دايم ورايه صواب
نامت الدولة بعدله والفهد للعدل سيد
أبو فيصل له تلين ارقاب ويطوع رقاب
هو ذرانا عن سموم عن عجاج عن جليد
بالشدايد نحتمي به ما نذل ولا نهاب
وله عضيد نفتخر به نعم والله العضيد
حب أبو متعب روينا منه مع عذب الشراب
وما علينا من حماقة كل شيطان مريد
ومن بغي تفريقنا مدحور وامر في تباب
مثل قوم بالكهوف ينابحون ومن بعيد
يحسبون الدين قتل الابريا والاغتراب
ومثل من ينبح بلندن وهو مطرود شريد
يوقظ الفتنة ويركض خلف آهات السراب
شارب كاس الجهالة زايغ قلبه بليد
يحسب الاصلاح ياتي بالشتايم والسباب
وتبعو له شلة ما بين ملحوق وطريد
يسفكون الدم ويشبون فتنه واضطراب
ناس سذج جاهلين ورايهم راي عنيد
زد على الجهل المركب ان دليلتهم غراب
ويش سوو وش عملهم وش نخلي وش نعيد
غير تهديم البيوت وغير تخريب الشباب
والله انه ما سلم منهم كبير ولا وليد
يقتلون المسلمين ويستبيحون الخراب
هم خوارج عصرنا بالفعل والعالم شهيد
نهجهم نهج ابن ملجم يا عساهم للذهاب
ما يفيد النصح معهم والله انه ما يفيد
يا فهدنا سل سيف الحق مصقول النصاب
انزع جذور الخوارج دون شرط ودون قيد
انتهى عصر التفاهم والتحاور والعتاب
اضرب بسيفك على الباغي يلين لك الحديد
وكلنا لك يا أبو فيصل كهل وطفل وشاب
ولا تسامح أي واحد بما شفناه إيد
لا تسامح غير من جا مسلم نفسه وتاب
دام فينا عرق ينبض عنك والله ما نحيد
يا فهدنا انت أملنا العدو يأكل تراب
وبالنهاية اطلب الله ربنا وهو المجيد
ينصر الاسلام ويعينه فقد جل المصاب
والصلاة عداد من زار ووقف باطهر صعيد
للنبي اللي صدع بالحق ما اعياه الجواب