تجربة حب

الحب كنه لعب حظ ويانصيب
مرات حظ أوفر ومره تكسبه
واللي فشل بالتجربة ماهوب عيب
من الأساس نقول هذي تجربه
العيب لا واجهتلك أصدق حبيب
شاريك من بد العباد وتعقبه
والعيب لاوقفت من دون القليب
لانتا عطيت الماء ولاإنك تشربه
والعيب لاناظر تلك أيات طيب
لافاعلن مثله وتبغى تنسبه
وأكبر خطا لاجات من يد الطبيب
زلة وزلات الطبيب محسبه
واكبر خطا لاخوّن لسان الأديب
وإلا السفيه إن جات محدن ناشبه
واكبر خطا من قال بنساب العريب
لا حاشمن نفسه ولا حشّم شنبه
واكبر خطا التحقير بإنسانٍ غريب
ولا عرف وش هو ولا عرف نسبه
ما يفهم المقصود يا كود اللبيب
اللي يجدّف بالفهامة مركبه
والحب كنه لعبه حظ ويانصيب
مرات حظ أوفر ومره تكسبه