( قلب المها )

وتشاركنا كذلك الأخت الشاعرة مها المطيري لاول مرة من خلال قصيدتها ( قلب المها ) التي خصت بها قراء ( ملامح صبح ) ومع شكرنا لها على اهتمامها وتواصلها مع الصفحة، ندعوكم لمشاركتنا قراءتها حيث تقول:
خلاص يا قلب المها خذ ما بقى لك من جروح=خل الليال المقبلة تربط عليك بكمها
لملم جروحك وانتهض لا تجلس هناك وتنوح=ورجل(ن) تبي ترجع ورى يا قلب سيح دمها
لا صار كل اللي تبي ودواك في يدين الشحوح=للحاجة اللي تجبرك لا بارك الله في امها
لا تتقي خلف الشجر وتخاف من صوت النبوح=الارض من دوس البشر لو كثرة وش همها
اطلع مطاليع النجوم اللي علت فوق وتلوح =البير من ميح الدلي لابد يصفى جمها
مافيه ليل(ن) سرمدي الا متقفيه الوضوح =واصبر على ميل الدهر وانت ابوها وسمها
وما كل براق (ن) سرى يعجبك برقه لو يلوح =كم مزنةٍ لا خيلة شهب الرياح تزمها
وبعض العرب لا تأمنه ياقف معك والا يروح =والحية اللي تقتلب اخذ الحذر من سمها
لا تأمن الدنيا ترى من طبعها ماهي نصوح =لوهي اضحكت لك ساعة(ن) لابد يلحق همها