دق جرس الباب ورحت فتحتوو إلا وألاقي بنت الجيران الصغيرة رهف بتقولي ياعمو تسلم عليكم أمي وتقولكم عندكم قووطة ؟ قلت لها تقول لأمها تسلم عليكي أم فتو وتقول لك ما عندها الا (حق صلصة تبغي) شمقت عيونها فيا وخصرتني وطلعت.. مين ياسيدي اللي كان على الباب هادي ياستي رهف بنت الجيران الصغيره تبغى حبة قوطة .. من فين ياحسرة من يوم ما ارتفعت أسعار القوطة ونحنا ما نستخدم إلا معجون الطماطم وإلا علبة الصلصة بعدين ياسيدي فهمني ليه كده أسعار القوطة صارت غالية ؟ لأنه يا ستي وزارة التجارة تطبل وحماية المستهلك بترقص وبالبلدي كده (ما عندك أحد) ونحنا تعبنا ونحنا نتكلم صوتنا انشقر ونحنا بنهرج ونقول يا هووه ياناس شوفوا حل لغلاء الأسعار اللي بتهل علينا كل يوم لكن مافي فايده مغني جنب أصنج ..حلقة الخضار فوضى في فوضى وكلوو من تحت راس المحرجين وأصحاب البرادات هدا غير البنقالة وغيرهم اللي جالسين يلعبوا في حلقة الخضار بكيفهم كل واحد منهم محتكر السوق في الخضار وفي الفواكه لأنه مافي رقابة عليهم وكلهم شغالين سلخ في عباد الله ما عندهم رحمة ولا خوف في عباد الله والمصيبة مو هنا المصيبة انه القوطة متوفرة في حلقة الخضار .. القوطة السورية متوفرة والقوطة التركية متوفرة والقوطة اليمنية متوفرة حتى انه في الحلقة في قوطة سودانية ومن أبدع ما يكون .. طيب ياسيدي طالما القوطة متوفرة بالشكل ده في حلقة الخضار ليه كده سعرها غالي ؟ لانه يا ستي مافي رقابة مشددة على دول التجار اللي جالسين يلعبوا في السوق على هواهم لكن لو في رقابة وغرامات وتشهير لهم بالاسم والصورة أتحدى أي واحد فيهم انه يرفع في سعر العازة اللي يحتاجها المستهلك ريال واحد لكن مافي لا رقابة ولا نظام كلوو فوضى في فوضى ونحنا الغلابا نروح في خرخر .. بس اللي يرفع الضغط ويجيب السكر ويوجع المصارين انك ما تعرف ليش تكون أسعار القوطة غالية كده؟ رغم انه القوطة متوفرة في حلقة الخضار عمرها ما صارت انه يوصل سعر صندوق القوطة أبو 4 كيلو ب 37 ريال يعني سعر الكيلو 10 ريال وعشان أكون حقاني 9.50 بعدين ياريتها جات على القوطة كل الخضروات في محلات بيع الخضار ارتفع سعرها الخيار اللي كان ب 4 صار ب 8 الفاصوليا الخضراء اللي كانت ب 6 صارت ب 14 ، البامية اللي كانت ب 8 صارت ب 24 ، الكوسة اللي كانت ب 4 صارت ب 14، وكيس الثوم اللي كان ب 5 صار ب 12.. والله مصيبة كبيرة ده اللي جالس بيصير في سوق الخضار ولمن تجي تسأل أصحاب الخضار ليه كده أسعاركم غالية يجيك الرد انه في حركة تصدير لأوروبا، والا يجي يقول لك انه القوطة خربت من كتر قوة حرارة الشمس .. شوف البكاشين برادات يا كبرها مكيفة آخر تكييف ويجي يقول لك حرارة الشمس هيه السبب عشان كده ارتفع سعر كيلو القوطه.. آآآآآآه منكم يا تجار ما يقدر عليكم إلا القوي جل جلاله عشان كده بقول ياتجار الخضار، ياتجار المواد الغذائية، يا تجار الدواء، ياتجار مواد البناء، ياتجار الحديد، ياتجار الاسمنت، يا تجار الأواني المنزلية، يا تجار الشعير، يا تجار قطع الغيار، ياتجار الأراضي، ياتجار شقق التمليك، يا تجار الكفرات، ياتجار زيوت السيارات، ياتجار الأدوات المكتبية، يا تجار السيارات، خافوا الله في عباد الله ترى نهايتها متر قماش وحفرة وقطنة وكل واحد وعمله.. وعيشوا كتيييير تشوفوا كتيييير. [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
