خد يبويا هادي ورقة المقاضي حق الشهر ؟ أووف ياساتر ايشبها كده زادت المقاضي ؟ الا واسمع ام فتو تقول لا زادت ولا نقصت ياسيدي هادي عازات كل شهر .. طيب طيب يللا بسرعه يا فتو البسي عبايتك والحقييني على السيارة عشان نقدر ناخد مقاضينا من باب مكة .. وركبنا السيارة وما فرملت الا وانا جنب بياعين العسل اللي صاروا زي الدود ماعلينا (كل مين في سوقه يبيع خروقه ) ركنت السياره جنب مسجد الملك عبدالعزيز ونزلنا على سوق باب مكة كعابي ومن دكان لدكان اليين انتهينا من كل المقاضي وبيني وبينكم التسوق في باب مكه شي جنااان ما يعرف قيمته الا العتقية اللي زينا المهم خلصنا من المقاضي واللي كنا نشترية في الشهر ب 1000 ريال صار في الزمن ده ب 2000 وكله ببركة التجار اللي شغالين فينا سلخ من كل شق وطرف لانه ماعاد صار عندهم رحمه على عباد الله .. ماعلينا خليهم يسووا اللي يبغووا طالما ضمايرهم ماتت والدنيا دخلت في قلوبهم ... المهم بعد ماحط الحمال المقاضي جوه السياره قلت لفتو تعالي نعرج على جدة القديمة وحاراتها تعالي اوريكي البيوت القديمة اللي خرجوا منها كبارية اهل البلد.. شوفي دحين نحنا داخلين على جده القديمه شايفه كيف البيوت قديمه شايفه كيف مبانيها روعه في التصميم شايفه كيف ازقتها ودخاشيشها شايفه كيف رواشينها الجميله شايفه كيف كانت البيوت قريبه من بعضها وكانت الطيبة والمحبة والاحترام والغيرة عنوان اهلها .. وكانت كل الحرف والاعمال يقوموا فيها اهل البلد يعني اللي يبني البيوت من اهل البلد والفران من اهل البلد والمزين اللي هوه الحلاق من اهل البلد واللي يشتغلوا في التجارة من اهل البلد واللي يلمع المواعين من اهل البلد والفوال من اهل البلد والمطبقاني من اهل البلد كانت لقمتهم من شغل يدهم وعرق جبينهم كانت الحياة حلوة وبسيطه ورخيصة مو زي الزمن ده اللي كلها هم في غم من البلاوي اللي بنسمعها ونشوفها .. هيا شوفي دحين نحنا دخلنا حارة اليمن وكان هنا بيت الجمجوم وبيت الشعراوي وبيت باحجري وبيت المقبول وبيت ابو زنادة وبيت الكيال وبيت عبدالصمد وبيت باعيسى وهنا كان مركاز العمدة العم علي عبدالصمد رحمة الله عليه .. وهادي دخلتنا لحارة الشام وشوفي هدا مسجد الباشا القديم وهنا كان بيت الشلبي وبيت زامكة وبيت الهزازي وهنا بيت حسن دوم وهنا كان بيت خشعان وبيت بن زقر وهنا كان بيت السرتي وهنا بيت الزغبي وبيت باعشن وبيت العشماوي وهنا بيت شمس وبيت باصبرين وبيت باخريبة وهدا مركاز العمده العم عمر باعيسى رحمة الله عليه .. وهادي ياستي حارة المظلوم وهدا سوق الجامع وهدا مسجد الشافعي من اقدم مساجد جدة القديمه وهنا كان بيت العم محمد سعيد باديب الله يرحمه من كبارية اهل البلد واكبر عطار كان في جدة وبيت باديب من البيوت اللي كانت عزيزه وغالية على قلب ابويا الله يرحمة ( بن علي الحلواني ) لاني كنت افتكر زمان وانا صغير انه كان في ديوان في نفس بيت باديب وكان ابويا الله يرحمة اشهر حلواني كان في جده كان بيسووي الحلويات البلدي الهريسه واللبنيه واللدو والنارجين في نفس الديوان اللي في بيت باديب .. وهنا بيت العشماوي وبيت آل درويش وبيت آل رضوان وبيت اللبان وبيت القمري وبيت شعيب وبيت الكيكي وهنا كمان كان مركاز العمدة علي شحات وهنا بيت الحنبولي كانت عوائل ياكثرها غاليه وعزيزة على قلوبنا في كل دي الحارات واللي نسيناه وما جبنا اسمه من عوايل جده الطيبين دخيلكم يسامحني .. لكن للأسف يابنتي في ده الزمن سكنوها جنسيات كتيييرة من كل شكل ولون زي منتي شايفه ودمروها وبهدلوها بتصرفاتهم وعاداتهم وتقاليدهم حتى استغفر الله الفساد والمسخرة وقلة الحياء صاروا بيمارسوها في هادي البيوت لانه كتيير من اصحاب هادي البيوت باعوها واللي اشتروها صاروا يأجروا هادي البيوت لكل من هب ودب وشوفي عاد البلاوي والمصايب والحرايق اللي بتصير في بيوت جده القديمه وكله من تحت راس هادول اللي سكنوا في هادي البيوت هدا غير انه في بعض البيوت لعوايل معرووفه انحرقت وانهدت لانه مافي اهتمام وعشان كده كنت اتمنى من كل قلبي انه اهالي جدة القدامي حافظوا على هادي البيوت الجميلة وحافظوا على تاريخ جدة القديمه عشان يعرف الجيل الجديد كيف كانت حياة ابائهم واجدادهم بدل ما هما تركوها لزعيط ومعيط ونطاط الحيط اللي دمروا وشوهوا جمال وتاريخ جده القديمة وعيشوا كتيييير تشوفوا كتيييير. للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
