عكاظ الاسبوعية يا حرمه خلاص كفاية هلكتيني قطعتي نفسي من ساعة ما دخلت البيت وانتي جالسه تبخبخيني بالعطورات وبملطف الجو، وجالسه كمان تجغجغيني باللبن الزبادي والتوم والكمون وزيت الزيتون، ايش هوه ده.. احسن عشان تاني مره ما عاد تروح للمركاز وتجلس مع اصحابك اللي ينفخوا ويشفطوا في الشيشة والمعسلات لانه حضرتك جالس تستهبل وانت عارف انه الشيشة والمعسل صارت بتنقل عدوى فيروس كورونا لاي شخص.. يا ستي قل لن يصيبنا الا ما كتبه الله لنا، بعدين بيني وبينك مباسم وليات الشيشة والمعسلات اللي بيستخدمها حبايبي اللي في المركاز كلها استخدام شخصي يعني مو زي حكاية (مد اللي يا حي واللي منتشره في القهاوي) في مركازنا كل واحد وشيشته ومعسله معاه يجلس يشفط فيها وينفخ اليين تخرج عيونه، وعاد هما بكيفهم الحجر من الارض والدم من راسهم وانا ياما نصحتهم انهم يبطلوا من العادة الخبيثة دي اللي اكلت من صحتهم ومالهم الشي الكتيير، لكن لا حياة لمن تنادي بس بيني وبينك كلامك صح والخبر اللي كان منشور قبل كم يوم صراحة خبر يخوف وفي نفس الوقت يفرح، واللي بيقول (حذر مدير جمعية «كفى للتدخين والمخدرات» بالعاصمة المقدسة إبراهيم بن أحمد الحمدان من انتشار فيروس كورونا عبر المقاهي؛ بسبب استخدام «ليات الشيشة»، وانتقالها من شخص لآخر حتى مع تغيير البلاستيكيات التي توضع عليها. وأوضح الحمدان أن الفيروس يبقى في الليات حتى لو تم تغيير القطعة البلاستيكية؛ لأنه مع الكحة أو العطاس للمصاب فإنه تترسب الفيروسات في داخل الليات وخارجها، وهذه عرضة لتنقل الأمراض، وخصوصا المعدية)، لكن الشي اللي اعرفه انه في قرار صادر من امانة جدة انها منعت اصحاب المقاهي من تقديم شرب الشيشة والمعسل في الاماكن العامة لكن اصحاب المقاهي بلوا القرار بمويه وشربوه وصاروا بيقدموا الشيشة والمعسل في اغلب الاماكن العامة وسط البلد وعييني عيينك وشارع التحلية اكبر دليل ويا ليت الحكاية جات على كبار السن في شرب المعسل والشيشة الا حتى صغار السن من الشباب صاروا يهبقوا من المدارس والجامعات وهاتك يا شفط ويا نفخ في المعسلات والشيشة وجات حكاية التحرر والتحضر وانا ليا شخصيتي ومحد له عليا كلمة وصاروا الاغلبية من الجنس الناعم اللطيف خبراء في الشفط والنفخ واخترعوا نكهات جديدة لطعم المعسلات وعشان كده زادت هادي الكافيهات اللي بتقدم هدا السم لشبابنا وبناتنا ونسأل الله السلامة لكن الحمد لله طالما وصلت الحكاية انه الشيشة والمعسل سبب رئيسي لنقل مرض كورونا للمشفطين والمشفطات حنلاقي اغلب المقاهي الفاخرة والشعبية فاضية وعقبال ما نسمع كمان انه التدخين سبب رئيسي لنقل عدوى مرض كورونا للمدخنين والمدخنات، لانه بصراحة الارقام والاحصائيات صارت تخوف وكل مين بعقله يعيش وعيشوا كتيييير تشوفوا كتيييير.
