كتير من حبايبي القراء غاوين شقا بيقولوا فين ما عاد تجيب لنا ألغاز في مقالاتك وعشان خاطر عيون القراء أقولهم ده اللغز وربنا يعينهم على حله ودحين خلوا بالكم من اللغز «بلد مكون من أربعة حروف ومن غير (ال) الحروف 1+2+3 نهاية الإنسان والحروف 2+3+4 مرض يصيب الإنسان والحروف 4+2+3 طعم لا يستساغ والحرفين 2+1 يصيب الإنسان والحرفين 2+3 يقدم للوالدين انتهى اللغز تقدروا تعرفوا اسم البلد»، ودحين خلونا نشوف ايش بيقول مقالنا حق الجمعة دي.. اشبو كده يا سيدي وجهك مبرشم لا يكون رادوي شاتك بالكورة على وجهك؟، أما رادوي ده حكايته حكاية ترك الكورة وشات اللاعب عبد الملك برناوي وكان يبغى يجيب خبره بس الحمد لله ربنا ستر ولطف وجا كمل الناقص بلكمة خطافية في وجه اللاعب عصام الراقي اليين سدحوا في الأرض، أنا ماني عارف هوه لاعب كورة والا حونشي وحبرتي روماني وجابوه عندنا عشان يكسر لعيبتنا، على العموم اللجنة الفنية وقفتو كم مباراة وحبايبنا الهلالية كمان ما قصروا خصموا من راتبه وعلى الله يتأدب بعد كده لأنه الروماني ده مشاكله في الملاعب كتيير.. وإن كان على البرشمة اللي شايفاها في وجهي وحضرتك مبسووطة ومصهللة لأني أنا عارفك تعجبك الخزاوة هدا يا ستي كله من تحت راس النامووس اللي جالس يسرح ويمرح في البيوت وفي الشوارع وفي أماكن العمل وشغال لسع وقرص في عباد الله لأنه يا ستي بعد ما جات المطرة والسيل الحبايب حقون أمانة جدة سكتم بكتم لا أرى لا أسمع لا أتكلم، ولا على بالهم ولا شافوا حل للناموس والبعوض اللي جالس يترعرع في المستنقعات وموية المجاري وأكيد عاجبها الحال.. الناموس شايف شغلو صح.. والمستنقعات في كل شارع وزقاق.. والمجاري أنهار أنهار ماشية في كل شارع وحي الييين جابت للناس المرض والعفن والقرف والدليل شارع دلة وشارع الأربعين واللي لهم دحين أكتر من شهرين.. والله عيب ده اللي جالس بيصير عيب.. أكتر من شهرين والحفر والمطبات وموية المجاري بهدلت الرايح والجي على دول الشارعين ولا حياة لمن تنادي ولا واحد فكر من المسؤولين اللي في مشاريع الطرق والصيانة إنه يشوف حل للمصيبة اللي جالسة بتصير في دول الشارعين.. الأمانة بترمي على شركة المياه وشركة المياه بترمي على الأمانة ونحنا الغلابا نرووح فطيس.. معقولة يوصل الاستهتار واللامبالاة إلى الدرجة دي.. عييب يا ناس عيييب شارعيين رئيسية يكون كده حالهم من العفن والقرف وياريتها جات على دي الشارعين أغلب شوارع جدة بعد المطرة اتبهدلت من موية المجاري والمستنقعات والمياه الجوفية والناس تعبوا وهما يتكلموا ويهرجوا.. الناس لا عرفت تمشي في الشوارع ولا عرفت ترووح للمساجد والمعلمين والمعلمات والطلاب والطالبات ما عرفوا يروحوا للمدارس من كتر العفن اللي جي على مدارسهم.. يا مسؤولين عن مشاريع الطرق والصيانة ومشاريع الصرف اللي بالمرة ماهوو صحي شوفوا حل للمصايب والمرض والقرف والعفن اللي جالس بيصير في شوارع جدة، شوفوا حل للناموس والفيران والغربان اللي نكدت على حياتنا وعيشتنا، جدة ما عاد صارت تتحمل أكتر من كده دخيلكم لجل الله شوفوا حل للمصايب دي وارحموا من في الأرض يرحمكم من في السماء وعيشوا كتييير تشوفوا كتييير. مثل حجازي: احتارت المقينة في الوجه الغلس [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
