ياهل القصيد إن كان ماهي كليفة خفوا شوي من الصوالين والنوق ومن الغزل ثلثين وإلا نصيفه خلوه حتى يصفي الجو ويروق لو إنها ضمن الأمور الطريفة اللي تخش القلب مع كل معلوق لكنها مثل الحبال القصيفة لا تلحق الجمة ولا بلت حلوق غبنا عن احداث الزمان المخيفة لاهين ونغنى على كل طاروق وحنا على رجمٍ هبوبه عنيفه ومن حولنا نوٍ له رعود وبروق واهل الردى كلٍ ينادي حليفه وابليس في درب الردا ساقهم سوق والكذب هذا وقت عيده وريفه والصدق صوته تالي الوقت مخنوق والشايعات من الأمور السخيفة شجرة خبيثة مالها ساس وعروق إن ما قطعناها بحد الرهيفة راحت على قول المثل هز قاووق وهنيّكم ياهل النفوس العفيفة ماهو بلاحقكم مشاريه وحقوق وعيونكم عن كل هفوة كفيفة ماهو عمى لكن نظراتكم فوق يفداكم اصحاب العقول الخفيفة اللي يطيرها معه كل مطفوق لو قال ماقد سال وادي حنيفة قالوا خبر صادق ومصدره موثوق ياهل الحكي ماكل صنعة شريفة بعض البضايع مالها عندنا سوق
