كان بيت الأسبوع الماضي للشاعر عبدالكريم ابن خزيم من البكيرية ويقول: ياواهم الدنيا ترى مالها حد قبلك كثير ماصفى له عناها وكان صدى البيت من الشعراء دنياك ماتسوى معك اخذٍ ورد ماحدٍلحق معها قصاها ومداها"" هذي ترى الدنيا تبي شدّ وكد لو زانت ايامٍ تغير هواها" ترى اسمها دنيا وما قسم لك سد اقنع بما عندك وتقطف جناها" عثمان ابراهيم الرشيد - الرياض بالآخرة فكر وانتبه لا تردد ونفس(ن) على الطاعات لا واهناها حذرا تغرك وأبذل العزم والجهد واعرف ترا الدنيا كثير(ن) غثاها وفي طاعة الله يا هني من تزود والنفس حذرا تتبعه في هواها محمد عبدالعزيز الخنيفر - أشيقر يالشاعر بن خزيم قولك هذا جد دنيا عسى ربي يكافي غثاها قدامنا ماقد صفت لاحد آبد كم نفس ماتت وهي تطرد وراها الله يجنبنا هل الشر والحسد آمين يا مجري السفن وسط ماها سعود مطرب العتيبي - الدوادمي كل يوم فكر في حياتك وجدد واتبع نفوس(ن) طيبة في خطاها اسعد بدنياك والحذر لا تنكد ووالديك احذر تخالف رضاها إن كان سلكت الدرب لازم توكد ودري المعزة واهني من مشاها ريان محمد الخنيفر - الرياض ابن خزيم طيب الخال والجد دنيا على المخلوق ماكثر غثاها احدن مشى فيها تقول مقيد واحدن يخض انعامها مع رخاها واحدن تحده يم ناس(ن) توعد تبى علاه القوم ترفع عصاها شجعان بن سعود المقاطي - الرياض ماهي قلبله وانت تعدهاعد ريح مجالك لاتباري هواها راحت حياتك كلها كد في كد دنيا،طويله ما تلاحق مداها كم واحد فيها ترى بيح السد اللي بعمره راح كله فداها حمد عبدالله الوايلي - حوطة سدير عمر الفتى مكتوب باللوح والعد كم نفس ماتت ماتحقق مناها خلك بربك واثق ﻻتردد دنيا الفنى مايندرا وش خفاها احذر تغرك واحذر اليوم تمتد اغنم حياتك واشترب عذب ماها عبدالمحسن المحيسن - رياض الخبراء افعل امور الخير واحرص على الجد كم نفس راحت ماتحقق مناها لاتضيع ايامك على الاخذ والرد لازانت الايام فاقطف جناها لاتغرك الدنيا مع الجزر والمد لو طالت خطاها قريب مداها علي الرشيد - رياض الخبراء يابو خزيم مزحها يعتبر جد يا كثر ناسن بس تلهث وراها كم وحدًن منها ترى قبلنا شد مات ورحل قدام يلحق مداها ماجت له الدنيا على كيف ماود دنيا مرارتها تخرب حلاها سعد صنهات السهلي - الدرعية بيت الاسبوع يكتبه للصفحة الشاعر مطلق بن منير المسند من القصيم ويقول حول انقطاع الكهرباء المتواصل على الكثير من القرى والهجر في انحاء البلاد ومدى معاناة المواطنين وخاصة مع هذا الشهر الكريم والحرارة الشديدة ويقول: ليه انقطاع الكهربا صار عادي ياناس سوى الحر فينا سوايا نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل: [email protected] أو على الفاكس 4871070/ 011
