اختلط سيله مع وجه الخضاره في مناظر زاهيه والجو باهي يا هل المكشات شدوها سفاره في مطلٍ مزهرٍ عشبه وزاهي فوق جال مرتفع مثل المناره خارج الديره وخير الله راهي خوّة النشمي عزيزٍ شب ناره واحدٍ مطنوخ في فعله وناهي حمد عبدالله الوايلي - حوطة سدير طبيعة الرحمن بشبه الجزيره تجسّدت ما بين عشبٍ.. وشلال عند المصب السيل نسمع خريره صوته على صم الحجر صافي ازلال جوآ طبيعي .. والمناظر كثيره من دوح وهضاب مجاور لها جبال من جا لذا الوادي بيبهج ضميره بين السماء والارض تشكيلة خيال سعود عبدالعزيز الهزاع - نعام مشهد ربيعٍ فيه ميّ وخضاره اختلط ثم انحدر في كل جال منظرٍ وصفه سما فوق العباره من غير ربّي يوجده والله محال محلا رياض البر عن جلسة عماره سج القدم ما دام بالحاله مجال قبل مايقفي هواها والنضاره الفيافي سجها بضعة لِيالْ سعود عائش الحربي - جدة زهى النبات بواحةٍ كلها خير من فضل وال العرش من غب الامطار تدفّق الشلال ويغرّد الطير في جو رايع جامعٍ عشب وازهار وجبال منظرها يجيب التعابير ذي صنعة الرحمن والناس تختار علي الرشيد - رياض الخبراء اليوم بعض الناس حلٍ وترحال تلقى السعاده لاصبح الجو ممطور وسيلٍ يغطي ارضنا شبه شلال هذي نعم وخيور من خلفها خيور واللي علينا الحرص من بعض الاطفال بعض المواقع والده غير معذور لازم رقابه بين روحات وإقبال هذي نصيحه لايجي عنده قصور محمد عبدالعزيز الخنيفر - أشيقر حيّ الرّبيع اللي يسر إلنا الخواطر وحيّ المصور يوم صور لنا الصوره لا صرت وسط البر والجو ماطر تحلى دلّة الكيف .. ويحلى فطوره خالد ناصر المخيمر - روضة سدير بعولنا زانت على السيل سقياه من دون مانعطي كماوي ولامبيد هتّان ربي بالمطر جاه واسقاه سبعين ليله والمطر يروي البيد من يشتري منّا ترى البيع بالجاه والعارفه تمشي قبل ليلة العيد فرصه ثمينه تعرفه وين منشاه متقويٍ متنه من السوق ماصيد عبدالكريم النغيمشي - لوذة سيول وطبيعه وسود جبال من صنع ربّي وتدبيره وين النشامى هل الكشتات؟ هالجوّ ما ودّك ابغيره يا زينها لوهن ابعيدات احسن من الدار والديره عبد الكريم عبدالرحمن السلوم - القرائن يا زِين شوف السيل والجو روعه وشوف الجبال وعطر نسمة ربيعه الخير زايد فيه من كل نوعه والوصف صعبٍ.. والمناظر بديعه صلاح بن ظافر - خميس مشيط الحمد لله دارنا كلها سيل يا مرحبا بالسيل حزّة وصوله ياربنا المعبود جعله تساهيل يا فرحة العربان باثنا حلوله واللي علينا كل وقتٍ تهاليل رجوى من الانسان واجب يقوله الكل يفرح لاسمع له تحاليل لاجل انتظار السيل لاجا هطوله ريان محمد الخنيفر نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى: [email protected] صورة العدد السابق