ألا واعذابي كل مادقني هوجاس هواجيس فكري خلّت النفس محتاره **** معي ماتفارق في وقوفي وفالمجلاس تصدر ويارد غيرها عقب مصداره **** وانا همي أبقى في زماني رفيع الراس مايشمت علي ناسٍ على القبر حفّاره **** أحاسب خطى رجلي قبل دربها ينداس وأداري لازل وناقدي يلفت أنظاره **** ولا أسلا وابن عمي علي خاطره محتاس أداري شعوره واعتذر وأقبل أعذاره **** ولا أشذب قفا الغايب ولا أكذب على الجلاس وجاري مالد الشوف له واكشف أجداره **** وأحب الخلا وارتاح لاذع ذع النسناس ولا أخاوي إلا فالمية واحد أختاره **** خويٍّ ينومسني ليا دقّت الأجراس على كل علمٍ غانمٍ طالت أشباره **** ترى الربح بين أهل الوفا تكسب النوماس ماهو مكسب التاجر رياله وديناره **** يقولون لا زل الرجل مرةٍ لا باس وأنا أقول لازل الرجل قل مقداره **** أنا اشره على الطيب ولو هو من أقصى الناس ليا أخطى طريقه ثم تعمّد لتكراره **** يفرّح عليه النذل واللاش والبلاس حداهم لو انه يضحك السم ب فكاره **** ترى الله خلق والله فرق والرجال أجناس وحتى يمين الرجل ماتشبه يساره **** ومن لا يحط بخاطره للعلوم قياس ليا سلم تارة ما سلم تاره وتاره **** عسى كل طيب يسلم الشر والأتعاس ونفسه من الصكّات في وقته مجاره **** فروق الرجال تبين ف الموقف الحساس وكلٍّ لابد الناس توصلهم أخباره **** وعلم الحيا لابد ياتي معا العساس ومن جاب علم ٍ زين يستاهل بشاره **** ولا ينبني بيت جداره ضعيف الساس ولا كل رامي لا رمى يطرح الشاره **** ولاصرت متعافي تعوّذ من الوسواس ترا النفس مهما كان بالسو امارة **** الشاعر : بطي بن مسفر الحبابي
