قال النائب عبدالله معيوف قبل كم يوم تحت قبة البرلمان ان قضية الاحتراف الجزئي جريمة بحق اللاعبين .. حيث لا يتسلمون مبالغ الاحتراف وتذهب إلى مجالس الإدارات .. كلام خطير جدا جدا وهالسالفة ماهي جديدة يا سيادة الاخ النائب بل هي قديمة ظهرت على السطح مع ظهور الاحتراف الجزئي وللاسف كل سنه بزود دام اهل التشريع غايبين عن متابعة اداء هيئة الشباب والرياضة والاندية التابعة لها .. ولعلم سيادة النائب والسادة الاعضاء المحترمين ومن باب تبرئة الذمة يؤسفني ان اقول ان مو بس اللاعب هو اللي يعاني من هالمشكلة بل اغلب العالمين بالاندية يعانون من هذه المشكلة المستعصية والمنتشرة باغلب اندية الكويت لان الكثير منهم ما يستلمون رواتبهم إلا بعد طلعت الروح وعلى دفعات متباعدة تهد الحيل وتكثر الشيب وعقب ما يشتكون ويتحلطمون لطوب الارض من تاخر رواتبهم واللي مو مصدق يروح الى اي نادي ويشوف العالمين فيه كل واحد منهم بيده جيريه يكلمها ويشتكي لها من تراكم الديون على ظهره اللي ماهو ناقص حمل يشيله .. وعلى رائسهم الطواقم الطبية من مدلكين واطباء يعانون من هالمشكلة .. وايضا الكثير من الاداريين العالمين والعمال المغتربين بالاندية وخصوصا الاداريين من فئة غير محددي الجنسية اللي يعانون الامرين من تاخر رواتبهم .. هالمساكين ما يدرون وش يسوون ووراهم اكوام لحم تبي تاكل وتبي مصاريف دراسة وفوق كل همومهم ايجار صاحب البيت اللي ساكنين عنده واللي يهددهم بالطرد في ظل ارتفاع الاجارات الشهرية هذا غير البقال والخباز وراعي الخضار يعني هو مو ناقص .. ونسيت كم صديق متسلف منهم هالاداري لحين ميسرة يعني يا سادة الحال كسفيه ويرثي لها لكل العاملين بالمجال الرياضي باندية الكويت .. في ظل عدم مبالاة اعضاء الاندية اللي تقبض من مليون دينار وطالع كل سنه وهالكلام ماهو لي بل لجدول المبالغ التي تحصلت عليها الهيئات الرياضية الذي نشر تحت صورة 4 فى 6 لنائب المدير العام للشؤون الادارية والمالية والتوريدات (ياطول المسمي) الدكتور جاسم الهويدي قبل كم يوم .. وبالاخير وقبل الختام ياليت اعضاء مجلس الامة وخصوصا الرياضيين منهم يتابعون هالموضوع الحساس لان فيه تفريج كربة لناس كثيرة عيشتهم على الله وثم على عملهم بهالاندية وسلامتكم . ألووو اخير : اسيادي واسياد اجدادي اللي يعولوا همى وهم ولادى . محمد خلف الشمري كاتب وناقد كويتي
