يا خوي ما ادري وش هالمبالغات، كل ما جبنا طاري شغالة جابوا لنا طاري دنبشة وأعمال اللهم يا كافي، يعني خلاص عشان صارت في كم ألف بيت بتقلبونها ظاهرة؟ الله يصلحكم، بعدين ياليت تاخذون السالفة من بعد انساني وتخلوا عنكم هالتحامل اللي ما له سنع، على هالضعيفات اللي عسى هالرويتب يكفيهن هن وعييلهن. انا اقول خذوا الدعوة ببساطة، وامشي عدل تحتار الدنبشة فيك، يعني وشو له هالادمية بتفكر تأذيك وانت ما ضريتها بشي، وليش يعني بتسوي لك مشكلة وانت تعاملها بالتي هي أحسن؟ هذا من ناحية، ومن ناحية ثانية..احب اقول ترا كل الكلام اللي فوق ما اني مسؤول عنه، لأني صدقت وآمنت ان الدنبشة فيك فيك، لو تعاملها زين والا شين، يا خوي تشوف الواحدة ترحمها وتقول هذي ما شاء الله عليها عاقلة وما عليها خلاف، واذا دق الكوز بالجرة على قولتهم تبان لك الدواهي وتغسل يدك من السواهي. اكيد ما ودي اعمم، لكن ياليت ننتبه يالربع، ترا بعضهن ما تعوق معها تخرب البيت لأنها ما هي خسرانة شي وكلما طلعت بمكاسب اكثر احسن لها، اللي طرا لي السالفة شغالة جيراننا اللي ما امداها تكمل شهر الا وهي جاهزة تروح ارب غوت تالنت.. ويقولون أحمد البايض راح ينسحب اذا شاركت هي!
