أنا مدري وش الفايدة من الرزة اللي على غير سنع.. عالم مو هامها الا بس تسوي مناسبات وتجمع لك من هالعالم وخذ لك يافلاشات ومجاملات واذا جيت للجد.. يالربع وش السالفة.. لا ابد لقينا نفسنا فاضيين قلنا خل نعزم اخويانا ونهايط عليهم ومعاهم شوي.. هذا غير انه مو مخلي صحفي في البلد موب عازمه..«على اساس ناقصين حنا صحفيين من النوع اللي يجي بدون عزيمة اصلا»..طيب ياعزيزي المرتز هذولي كلهم وش تبيهم يكتبون وكل اللي يعرفونه عنك انك معشيهم على حسابك؟.. طيب يألفون سالفة من عندهم مثلا؟.. وانت من بكرة بتبدا تشيك على كل واحد اذا هو نزل الخبر والا لا.. طيب أي خبر اصلا يابني ادم وانت ماسويت شي ولا قلت شي وماغير رايح جاي وتوزيع ابتسامات ولا في أي أكشن في سالفتك هذي كلها؟ هذي مشكلة اللي يبي يكسب بالقوة وهو ماعنده راس مال، وكل همه الفلاشات والتميلح الاعلامي.. زي هذي كيف تفهمه ان الناس قيمتها باخلاقها وتعاملها ومنجزها قبل كل شي.. اصلا وين بتلاقيه عشان تفهمه.. وهو كل يوم راز له بطاقة دعوة لمناسبة يعني شوفوني انعزم.. موب بعيدة بكرة يقول تراني تكرمت.. طيب وش الجهة اللي كرمتك.. موب لازم تعرف.. طيب على ايش ياحسرة؟ محد يدري.. ولاحتى هو!
