شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال وله رأيه الخاص بالطبع.. - أكيد إنك تتابع التلفزيون هالأيام بكثرة؟ صحيح ومن كثر المسلسلات ماعاد عرفنا وش نتابع. - يعني منت مركز على عمل واحد؟ لا والله ماني عارف أركز زين بس فيه أشياء أصبحت من الأولويات في المتابعة. - مثل أيش؟ عندك مثلا طاش وباب الحارة وبعض الأعمال التاريخية. - يعني شفت حلقات طاش اللي راحت كلها؟ أكيد وشوفها مرتين العرض الأول والإعادة. - وش أكثر حلقة شدتك؟ الحلقة الأولى صراحة في الصميم. - إنت تشوف إن أعمالنا السعودية غير طاش تستحق المتابعة. تبي الصراحة مو كلها. - ليش؟ لأن بعضها خال من الفكرة والقصة وكلها حشو. - بس الأعمال السعودية مطلوبة من القنوات الفضائية؟ مطلوبة بغرض التسويق وجلب المعلنين. - أهاااا يعني مو لقوتها وطرحها؟ تعرف إنت السوق السعودي سوق قوي والكل يريده. - من اللي يشدك من الممثلين في الكوميديا وإلا التراجيديا؟ في الكوميديا القصبي بلا منازع أما التراجيديا فهم كثير. - مسلسل تمنيت أنه يكون له جزء ثاني؟ بصراحة عيال قرية. - وش الأسباب؟ لأنه عمل ظلم حقيقة وهو عمل كوميدي رائع. - طيب مسلسل تشوف إنه من الأفضل وقفه؟ هوامير الصحراء. - ممكن نعرف الأسباب؟ فيه تجاوزات كثيرة. - هذي يسمونها جرأة في الطرح؟ الجرأة الزايدة مشكلة كبيرة في مجتمعنا. - على كذا ماراح يكون فيه مواضيع جديدة؟ هذا دور الكتاب في خلق القضايا ومناقشتها صح. - الناس يقارنون المسلسلات السعودية بالخليجية وش رايك؟ أنا اشوف إن الأعمال السعودية بدت تضرب بقوة. - كيف؟ انت تابع وتشوف إن أعمالنا لها طابع خاص ميزها عن باقي الأعمال. - يقولون برامج المسابقات تغري وش رايك فيها؟ من عرفت نفسي وأنا ودي أشارك في برنامج وافوز ومليت من كثر الاتصالات وخساير وآخر شي يروح تعبك على الفاضي. - وش أكثر برنامج تتابعه؟ سباق المشاهدين فكرته روعة. - وحروف وألوف كيفك معاه؟ مو على طول أشوفه على حسب الفراغ.
