دحين أنا أبغى أفهم إنت جايب كل هادي العازات ليش؟ خيش فحم وطشت وكروانات وخشبة غسيل.. هدا ياستي عشان ما تغسلي بالغسالة ولا تكوي بالمكوى عندك الطشت وخشبة الغسيل تغسلي فيهم الملابس ولما تخلصي حطيهم في الكروانة ولما يجي وقت الكوي تجيبي الكانون وتعبيه فحم وتجيبي مكوى الفحم اللي موجود مع الكراكيب اللي في المخزن عشان تكوي فيهم الملابس ولا تنسي تخلي جنبك كاسة كبيرة مليانة موية عشان (تبوخي) على الملابس (بففففففف) عشان تتكوي الملابس صح وما تكون مكرمشة وإذا جوكي ضيوف أو أوادم شغلي لهم المروحة الجلاسي والا أقولك أعطيهم مراوح السعف اللي اشتريناهم من باب مكة لأنه مو معقول يجلسوا كلهم في غرفة وحدة ومكيف واحد شغال ... دحين ممكن تفهمني ليه كل ده الهيلمان وليه كل دي الحكاية ؟ أصلك إنتي منتي عارفة ايش الحكاية ؟ ايش الحكاية ياسيدي قول وخلصني .. الحكاية بتقول إنه واحد مسؤول كبيير من حقون الكهرباء قال بعظمة لسانه لا تغسلوا ولا تكووا في البيوت وإذا تبغوا تشغلوا المكيفات شغلوا مكيف واحد بس يعني يا أهل البيت اتلموا كلكم في غرفة وحدة زي علبة سمك السردين.. وقال كمان بلاشي تشغلوا التلفزيون عشان نوفر الطاقة. عشان كده أحب أقول لكل الغلابا اللي عنده نص درزن بزورة خليهم يتسلوا بلعبة (طيش) والا (الزقطة) والا (البربر) وبلاشي من التلفزيون ومن أفلام الكرتون، وشي تاني أبغى أقوله لا تولعي أنوار البيت طالما عندنا كشافات في كل غرفة لأنه بسلامته بيقول إنه نحنا المشتركين اللي بنتسبب في انقطاع الكهرباء. عشان كده خلي بالك من كل اللي قلتو لأنه بعد كل ده حتجيك فاتورة آخر الشهر تقصم ظهرك يا مليح .. شفتي كيف هادي تبريرات شركة الكهرباء نحنا السبب في انقطاع الكهرباء. لنا سنوات طويلة ونحنا بنسمع ونقرأ عن مشاريع بمليارات الريالات عشان زيادة الكهرباء في البلد.. أنا ماني عارف ليش بعض المسؤولين يحبوا يستفزوك ويوجعوا قلبك ويفقعوا مرارتك بتصريحاتهم الرنانة .. فين التخطيط فين فرق الصيانة فين شبكات الكهرباء فين التطوير فين الخدمات الإضافية اللي بتتكلموا عليها.. كل يوم والتاني لكم تصريحات وكل اللي بنشوفه حبر على ورق. عشان كده أبغى أفهم المسؤول اللي قال التصريح وأقول لو بالفم المليان: طالما أهالي البلد بيدفعوا قيمة فواتيرهم فمن حقهم إنهم يستهلكوا الكهرباء زي ما يبغوا عشان راحتهم وراحة أهل بيتهم، أما إذا لم يسددوا قيمتها فمن حقكم إنكم تقطعوا عنهم الكهرباء. عشان كده بقول يا حبايبنا ياللي في شركة الكهرباء احترموا عقولنا شوية وشوفوا لكم تبريرات غير هادي تزحلقوها علينا شوفوا حل سريع وجذري لحكاية انقطاع الكهرباء في البلد خلو اجتماعاتكم وتصريحاتكم ومشاريعكم اللي بتتكلموا عنها واقع يحس فيه ابن البلد .. صحيح إنه درجة الحرارة في البلد عالية بس في شي برضو اسمه تخطيط اسمه رستكة يحل كل مشكلات انقطاع الكهرباء اللي بتصير واللي بيعاني منها أغلب سكان البلد. وارحموا من في الأرض يرحمكم من في السماء. وتوووتة تووووتة خلصت الحدوووتة .. وعيشوا كتيييير تشوفوا كتييييير. [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
