ايشبك كده يا فتو زعلانه وشايله هم الدنيا على راسك؟ والله يبويا اللي بشوفه في الجامعه والكلية والمدارس الثانوية والمتوسطه يشيب الراس.. ياساتر يا لطيف ايش اللي بتشوفيه يا بنتي؟ هادول البنات اللي مسويين نفسهم مسترجلات تشوف الوحده منهم تحسبها ولد وهيه بنت لكن تصرفاتهم تخلي الواحد يتقزز منهم أشكال ومناظر غريبه.. يا بنتي فهميني ايش جالسه تقولي؟ أنا أفهمك يبويا في بنات نسأل الله انه يهديهم ويصلحهم تشوفها تحسبها راجل العباية كانها توب والقصة كانها قصة ولد هدا غير لبس الساعه الرجالية والكابات والكنادر (الجزم) الرجالية تلاقي الوحده منهم تمشي زي الحبرتية فارده جسمها وفاتحة زرار القميص ولافه كم القميص الين الكوع هدا غير انه منهم بيلبسوا سراويل بيضاء طويله تحت المراييل زي السراويل اللي انت بتلبسها تحت التوب هدا غير العطورات الرجالية اللي بيتعطروا فيها وكله كوم وشرب السجاير في الحمامات والا في الأماكن المعروفه بينهم واللي بيجتمعوا فيها لا والمصيبة الكبيرة كمان تلاقيهم مسميين نفسهم اسماء شباب: ماجد – متعب – نواف - تركي - واللي تبغى تدلع نفسها قصدي يدلع نفسوو تلاقي اسمها ميدو وهدا كله من تحت هادي الفضائيات والمسلسلات التافهه اللي ما يجي من وراها إلا العفن والقرف والخراب وغيرو وغيرو كتير ما أقدر أقوله... والله يابنتي يافتو هدا كلام كبير ويخوف معقوله أهاليهم ما يعرفوا هادي الأشياء عن بناتهم فين اباهاتهم فين اماهاتهم فين اخوانهم تاركينهم كده يسرحووا ويمرحووا على كيفهم وبيروحوا للمدارس وهما بالمناظر المقرفه والمقززه دي بعدين هادول البنات ايش اللي جرى لمخهم عشان يسووا كده وعشان ايه وايش اللي حيستفيدوه لما الوحده منهم تسوي كده وربنا سبحانه وتعالى أعطاهم العفة والأنوثة واعطاهم العقل والتفكير بس اكيد هما ماسوو كده الا وعندهم خلل في تركيبة عقولهم أو تربيتهم والاهم من ده كلوو انهم ضايعيين دينيا هادي ظاهرة سيئة ولازم يكون لها علاج صارم وقوي من أصحاب التخصصات عشان نقدر نحارب هادي الظاهرة القذرة اللي انتشرت بكثرة في أغلب التجمعات التعليمية النسائية لازم يكون في قوانين صارمة في كل التجمعات التعليمية من المديرات والوكيلات والمعلمات اللي فيها هادي الاشكال عشان نقدر نحاربهم ونوقفهم عند حدهم يعني بالبلدي كده اللي تجي للجامعه او للكلية او للمدرسة بالشكل ده يعطوها انذار شفوي ما تابت انذار كتابي ما تابت يبلغووا اهلها ما تابت يفصلوها عشان نحمي بناتنا من هادي الاشكال لانها بصراحة ظاهرة زادت عن حدها وانتشرت بكثرة مابين البنات واكيد السبب لهادي الظاهره هو التفكك الاسري والحرمان العاطفي اللي محرومه منه البنت وما بتلاقيه عند اهلها والسبب المهم كمان ضعف الوازع الديني عندهم عشان كده بتمنى انه يكون في توعية ومحاضرات دينية من الاخوات الداعيات في الجامعات والكليات والمدارس وتتوزع عليهم برشورات توعية توضحلهم انه ده اللي بيسووه غلط في غلط لانه رسولنا صلى الله عليه وسلم بيقول في الحديث الشريف ((لعن الله المتشبهين من الرجال بالنساء والمتشبهات بالرجال من النساء)) واللعن زي منتو عارفين هوه الطرد من رحمة الله اسأل الله سبحانه وتعالى الهداية لبناتنا وعيشوا كتييييير تشوفوا كتييييير هرجة هادي مشكلة مجتمع يا مختصين لازم نعترف فيها ونحاربها بكل الوسائل والطرق [email protected] فاكس 6764070 للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
