مرثية أم أسامة كتبها لسانٌ قلبٍ دامٍ ينزفٌ ألما وحسرة على فراق زوجته وتوأم روحه وضياء قلبه وسنا وجدانه . كتبها لسان حال أخينا /علي بن يحيى الظافري – أبو أسامة - يرثي زوجته – أم أسامة - التي فارقت الحياة بسبب لا مبالاة الطبيب وإدارة المستشفى . لي أنا يا ناس كانت حليلة *** حبيتها حبٍ من قلبي كبير عشنا مع بعضٍ سنينٍ طويلة *** وقدر لها ربي بداءٍ خطير رحنا بها المشفى بروحي عليلة *** تشكي السقم واشكي أنا شيْ غير وفي الطوال العام قضّيت ليلة *** مهمومٍ وكني طيرٍ كسير مشغول أنا بالي وما باليد حيلة *** والطاقم الطبي في انس وسرور وخلو علاج زوجتي ليدّ بديلة *** ممرضة لأجل الطبيب قامت بدور وعاينتها ممرضه غبية وجهولة *** ولا عندها شخص يقله خبير والطبيب جالس يمدد رجوله *** وثاني بعد نايم ويشخر شخير وين اشتكي ياناس منهو أجيله *** وصرت من قسمٍ لقسمٍ سفير وقال الأطبا ذاك المناوب رحوله *** ولا اتصل لو شيت بابن الشبير وضع المرَة جيد يا أخي ما يبيله *** خل الزعل واسكت وخلك صبور وبعد ساعة أجت سستر عجولة *** تنادي الاطبا وجهها ما فيه خير صحت النايم وذا عدل رجوله *** وقالتلهم بالإنقلش شي غير طاروا وأنا عقلي بعد طار غيلة *** أجري ولا أدري وش اللي يصير جوها وهي تنزع وكلٍ وقوله *** في ربشةٍ قامو لوضعٍ خطير ذا يقترح ابره وذا ماله وسيلة *** وأنا بغى عقلي وربي يطير وبعد بضعة دقايق قليلة *** جاني الطبيب المحترم وجهه كسير قلي ترى ماتت وكرر مقولة *** خلك رجل مؤمن وخلك صبور وخار أنا جسمي مني بطوله *** ورميت نفسي على ذاك السرير ناديتها والناس حولي ذهوله *** يا بعد روحي ويا حلمي الكبير يا بعد قلبي ويا حلم الطفولة *** ويا روح روحي أنا بعدك ضرير أعطيك روحي بدل روحك بديلة *** دونك أنا وش ودي أصير يارب انت الذي دوم ارتجيله *** راضي بقضا ربي وحكم القدير أنا دموعي بالمحاجر مسيلة *** وصدري بناره يحترق مثل السعير يا حسبي الله على كل الذي له *** يدّ تسبب لي بهذا المصير ضفرها عندي بالف لحية طويلة *** من لحاكم يا عديمين الضمير دكتور مهمل وفوقه إدارة عميلة *** وغطو سوية على فعل حقير إهمال واضح ووالله ما يبيله *** كا الشمس وسط السما وقت الظهير لو شكوتي ممكن تعيد الحليلة *** كان اشتكي عند الملك ذك المدير لكنها راحت وماتت بغيلة *** والله شاهد على كل اللي يصير ضعيفٍ ومالي أنا باليد حيلة *** وخصمي أنا يا ناس خصمٍ كبير اعلل النفس وهي نفس عليلة *** أصبرها ومرة أقول يا لله تطير وتم الدفن وجتني تعازي القبيلة *** قدامهم أكضم أسا نفسي الكبير من شافني يذكر معاني الرجولة *** من كثر ماني مبتسم كني سكير والليل آه يا لليل ساتر فعوله *** أبكي وربي بكى طفل صغير أذكر حياتي وقصة الحب الطويلة *** واذكر جلوسي معك بعد العصير يا ليت يومي كان قبلك بليلة *** وأموت وانتي أمام عيني بخير أذكر تماشينا وأسفار طويلة *** واذكر سهر تحت القمر بعد الأخير حكايةٍ أجمل من الف ليلة وليلة *** كنتي الأميرة بها وانا كنت الأمير من بعدكي صارت حياتي ثقيلة *** ضايع انا بعدك كأني ضرير واصبحت واطفالي كأزهار ذبولة *** من بعد ما غابت القلب الكبير يارب تسقي قبرها دوم بوشيلة *** ويارب وسع قبرها وخله منير ويا رب تجعلها على الجنة نزيله *** وفيها تجمعنا على أنس وسرور
