في حديثٍ لصدى الملاعب، فتح اللاعب المصري حسام غالي -المحترف السابق في صفوف النصر السعودي- النارَ على إدارة العالمي، قائلا إن إنهاء عقده لم يكن لأسباب فنية، مؤكدا أنه لن يكرر تجربة الاحتراف في الدوري السعودي مرة أخرى. "ماجد التويجري: نادم على إنك جيت من إنجلترا مباشرةً للسعودية؟ حسام غالي: لا مش نادم، هي كانت الفرصة الوحيدة ليا تقريباً بعد اللي حصل في توتنهام، كان نادي النصر هو الجد في عروضه زائد نادي من الدرجة التانية في الدوري الإنجليزي بس أنا ما كنتش مهيأ ساعتها إني ألعب في الدرجة التانية، ما كنتش حابب إني ألعب درجة تانية في إنجلترا، فجيت نادي النصر، بالنسبة لي قدرت أحقق حاجات كويسة، كوني أرجع منتخب مصر بيتهيألي دي كانت حاجة بالنسبة لي ضرورة أساسية. ماجد التويجري: مش ممكن كابتن يقال عنها أنها تجربة فاشلة؟ حسام غالي: عدم استمراري مع النصر ما أعتقدش إنه حاجة فنية يعني هي حاجة في الآخر هي مشاكل تقريباً وهي خلاص عدم راحة نفسية، أداء النصر طبعاً كان متحسن، مش بقول إن أنا صاحب الفضل الاول في التحسن أو في الحاجات اللي حصلت لكن شاركت. ماجد التويجري: في تقدير لك في الدوري السعودي لو انت لعبت مثلاً لفرقة تانية غير النصر، تعتقد كان ممكن تبان بشكل أحسن؟ حسام غالي: أعتقد والله يعني معرفش يعني طبعاً في أندية تانية بتلعب كورة كويسة في السعودية طبعاً الشباب والاتحاد والهلال.. ماجد التويجري: كنت تتمنى تلعب لها كابتن؟ حسام غالي: ما كنتش أتمنى يعني أتمنى إني كنت أتقدر أكتر من كدة ممكن تقول، محدش وقف جنبي بالصورة اللازمة أو بالصورة اللي كنت متخيلها يبقى حد في ضهرك كدة حاميك أو مساندك، دي ما حصلتش، معرفش لو كانت في حتة تانية كان ممكن حيبقى الوقفة أكتر من كدة ووقفة إيجابية أكتر من كدة ولا لا. ماجد التويجري: إذن كابتن ظلموك خذلوك؟ حسام غالي: ما اتظلمتش بس ما كنتش متوقع الوضع كدة في السعودية أو نادي النصر، يعني قبل ماجي كانوا قالوا لي نادي النصر مفيهوش الحاجات دي كلها. ماجد التويجري: حاجات ايه؟ حسام غالي: زي تأخر الرواتب والكلام دة كله مش موجود في نادي النصر عشان فيه تقريباً معظمه أمرا كتير بيديروه وكدة فمش حتلاقي الحاجات دي هناك. ماجد التويجري: مش منظمين، مش مرتبين؟ حسام غالي: نادي النصر أو الاندية السعودية بشكل عام بتعتمد على sponsor واحد بس بيمولها وأعضاء شرف ممكن يدفعوا وممكن لا، وممكن المبالغ اللي بيدفعوها ما تغطيش الميزانية الموجودة للنادي، فالحاجات دي كلها ممكن تأثر على الاندية السعودية وعلى جدولة الرواتب، في السعودية ما اعتقدش إني أكرر التجربة تاني خلاص، أنا شفت.. ماجد التويجري: تجربة النصر خلتك تكره السعودية مثلاً؟ حسام غالي: مش بكره السعودية، أنا جربت السعودية وجربت اللعب في الدوري السعودي فما أعتقدش إني ممكن أكررها تاني، عندي شوية تحفظات على حاجات فما ينفعش أرجع وأشوف نفس الحاجات دي تاني."
