يا قانص الشرّد وبيديك بلجيك و وسمك على صدور الجزايل دواير و دايم وعشاق الفرايد تراعيك اللي على صيدك تسوق البشاير خذ الكلام اللي عن الصدق ينبيك نصيحةٍ ما قالها كل شاير مادام ربك يا احمر العين معطيك لاتعرض الندّر بسوق الخساير الصمت في بعض المواقيف يكفيك عن كلمةٍ يصدح بها كل باير اللي عليك مصوبٍ بالتماتيك يضحك وهو دمه من الحقد فاير عليك باللي ماتخيّب هقاويك في ساعة شده حزام وذخاير روس الرجال اللي على الحق تهديك قطاعة الفرجه نظاف السراير اللي مباديهم توافق مباديك الله خلقها مع بعضها نظاير لا جيت بالجزله تثمن معانيك واحساسهم سربٍ مع الشعر طاير ولا شفت لك خبلٍ بعوجاه يرميك هماز نهازٍ كلامه معاير ان جيت شيد لك عماير حواليك وان رحت ضحابك وهد العماير وكل الصفات السيئه حطها فيك وعرّضك درب مدورين الجراير يكسر علومه والا عنده بريك ما تنعدل لو وسقت بالجباير بعض السوالف ساواها في مواطيك وارفع مقامك عن طمان الصغاير وعن مثل هذا صك كل الشبابيك واسدل عليها محكمات الستاير وقله يوقّف لا يجي في حراويك بح له عن اللي كامنٍ بالضماير ترى الكرامه عند راع الوفا شيك ممنوع صرفه في جميع الدواير
