ماادري وش اللي يقلب الدنيا ويخليها تزين؟ وش يجعل الأشيا كثير اجمل وش يجعلك فوق العروش الأوله في مملكات الفاتنين! أحس ما كني بشر .. في شوفتك أتحول نجوم وقمر واضوي لك الظلما شعر واغردك مثل الوتر واقول للفرقا دخيلك لو سمحتي لا تجين . من تجين أعطرك عطرين عطر اشواقنا وعطر الحنين. واغيب في طيب اللقا والملتقى والياسمين أشرب من النشوة حياه أسقي تفاصيل الحياه واحياك ياكل الحياه في ساعتين ياانتي ترى ماكنت انا قبلك ولا بعدك بكون .. يا أول اطوار العقل يا آخر أطوار الجنون. يا إختصار العشق والعشقات واللي يعشقون لبيك لبيك وتراك اللي على كلي تمون وشلون لا وانت النظر وانت البحر وانت السمر وانت الفتون من تجين أقول يا سبحان من سواك رب العالمين يا أروع احساس تجاوز فلسفات المبدعين شلال من فتنه ونور سحر يذل الحور ويهد الغرور روز ثقيل وحوله العالم تدور يا درة الدر ونشيد الحر ويا بدر البدور يالين طبعك لو قسى ياعدل قلبك لو يجور انتي أبد ما تشبهين احد أبد ولو كل زين بك تشبه أو تقرب واجتهد مالك مثيل الا المحال المستحيل المستحيل جل الذي جلى جمالك اشهد انه أكثر اكثر من جميل من تجين يلفني صمت الخشوع وافنى مثل ضي الشموع واستلهم ابعاد الغموض أخوض في جوف القوافي والعروض اسيس جفال الحكي واغيّض المعنى لغيوض واصير شاعر في دجى الكلمه ينوض اترجم اشكال الدلال افسر إشكال السؤال واعيش ما بين الحقيقه ونصفها - وبين الخيال رحال مابينك وبينك اسج من عينك لعينك واصير مرسول الملا وسفيرهم مابين ايدينك من تجين اقطع خطوط الذاكره واشطب على باكر واكون في شرع الغرام - الناسي الذاكر إذا شطحت استجمعك إذا تعديت ارجعك الله يا الله يا الله ما أروعك ملاك لكنك بشر بشر ولكنك ملاك عندك تعلمت الحذر لجلك تعشقت الهلاك أنا بلاي انك بلاي وانتي بلاك اني بلاك دنياك ما تنفع بلاي ودنياي ما تنفع بلاك من تجين أنسى اللغات وخارطات الكون كله والخواطر من سفرها تعود لكن مسفهله أتنثرلك دروب واشرق بليا غروب واحلف اني عن هواك اللي ذبحني ما أتوب كيف يمضي الوقت مدري كيف يجري كيف وانا في وجودك - احلم وباسمك أهذري! آه يا أتلى مدى واقرب مدى واطول مدى كل نبض ان قلت احبك ارتعش بي وابتدا وكل حرف اليا شعرت انك ملكتيني شدا حبنا الصوت الحقيقي وباقي الحب الصدا ولو يعرف اللي غدا بالحب مثل اللي نعرفه- ماغدا من تجين المطر يهدى وترتاح العواصف ويتجلى احساسي اللي غردت فيه العواطف أطرب لكل الثواني اللي تمر كل ثانية عمر آه يا سرعك ويازينك عمر فيك اطارد بين ميلادي وموتي وافضح الشوق بسكوتي واسبح بتسبيح راهب مغرم بكل المذاهب مهتوي ، مرفوع عن عقلي العتب ولا يهم اللي يعاتب دامني جاوزت حدك يالهوى واعتليت اعلى المراتب ومن يكون الحب همه لايهمه يقطع زمام الملام ولا يحاسب من تجين ما عاد يعنيني نهار ولا غياب ولا انتظار ما دامك الشمس الحضور المعركه والإنتصار ولا عاد يعنيني الكلام اللي يضيع يكفيني اني بك اضيع يكفيني اني بك ربيع تشعبي في داخلي لك ألف ديره وألف دار استوطني كل الجهات الغي مسافات الحوار
