الليلة نكمل حوارنا الذي بدأناه في الليلة الماضية مع الأستاذ عبدالله إبن صوت الأرض الفنان طلال مداح رحمه الله. لماذا لاتكون أنت المصدر الوحيد لكل مايخص والدكم رحمه الله ؟ صعب جدا أكون المصدر الوحيد لسبب , مافيه أحد في حياة الوالد رحمة الله عليه , يكون متواجد معاه على طول حتى لما يجي سؤال يجاوب عليه ممكن السؤال يكون موجود في الأنترنت والشباب يجاوبوا عليه نيابة عني فأنا جاوبت أكثر من 15 ألف مرة إنه إتحادي ولسه بيطرح السؤال وهو غنى للإتحاد والأهلي والهلال والنصر لكنه إتحادي هذه معلومة صعب تكررها وإحتكار المصدر ماله داعي . هل يوجد أحد من أبناء طلال مداح رحمه الله لديه موهبة الغناء ؟ نعم رأفت دخل الوسط الفني ولكنه لم يستمر وأنا أكتب وألحن أيضا وعندي الغناء لكن ماحبيته ومادخلته وفيه أحمد صوته حلو وخالد كمان صوته جميل ..المسألة مو موهبه المسأله إنك تحب المجال وتدخله ومافي أحد من الأبناء أو الأحفاد الباقين ومو ضروري كل فنان بيكون له إمتداد صحيح إبن الوز عوام في نفس الوقت يكون الفنان إمتداده من أسرته فيه فنان يكون خليفة للفنان أو إمتداد له لأنه أخذ روح الأداء وروح اللحن وفي نفس الوقت الموهبه وأنا دائما أقول أسامه عبدالرحيم خليفة طلال مداح وإمتداده وعندك عبدالرحمن الحسن صوت جبار روعه وعزف وأداء وهذا ظهر بقوة في الساحة يمكن يكون هو إمتداد لفنان آخر..الأن الوسط الفني عباره عن إستراحة محارب يعني مافيه إبداع فيه أصوات حلوة مافيه إبداع فيه ناس دخلت الفن للفلوس وناس دخلت للشهرة ما في أحد دخل الفن للفن فيه أصوات ظهرت وأختفت . صوت الأرض رحمه الله له مواقف إنسانية كثيرة حدثنا عن بعضها من التي كنت حاضرها ؟ المواقف اللي تكلم عنها بدر وكثير من الأصدقاء تكفي مافيه إنسان مافيه الخير وبعض الأشياء ماعرفناها إلا بعد وفاته يده سخية مايضرب حساب وأتذكر في جلسة من الجلسات وأيامها كنت أعمل في مستشفى الحرس وجاء واحد معاه تقارير أن زوجته مريضه وتحتاج عمليه وكانت أختام التقارير كلها مضروبة وكان بيتكلم مع الوالد ودخل الوالد وخرج وأعطاه 10 آلاف ريال وصار الرجال يحلف ويقول العملية تكلف 50 الف ودخل الوالد مرة أخرى ودخلت وراه وقلت لاتعطيه الرجال مو صادق في اللي يقوله قال طيب أستنى وقال له اللي عندي 30 الف هذه 15 أعطيتك هي وأقتنع ومشي قلت لأبوي إنت تتصرف وماتدري الواحد يقول ماعليه وأنا اقولك نصاب وتعطيه قال ياولدي إنت إيش يدريك ويمكن ربك يتقبل الأدعيه اللي يدعيها ماكان يفكر في العايد والدي من النوع اللي يقسم اللي عنده مع غيره ومايحب أحد يعرف عن هذا الشيء . يقال أن طلال مداح رحمه الله كان يسير بسيارته في إحدى الليالي في حي من أحياء جدة وفي طريقه شاهد زواج فما كان منه إلا أن أوقف سيارته ونزل ليحيى الحفل مجانا حدثنا عن هذه القصة ؟ كثير عملها الوالد رحمه الله كان في شبابه معزوم عند واحد من التجار وأتفقوا مع لطفي زيني مدير أعماله وهو رايح أصلا له , شاف زواج مافيه طرب وسأل مين فنانكم قالوا ماعندنا فنان الرجال على قد حاله ومسك العود حقه وطنش الفرح الثاني اللي المفروض يروح ويقبض فيه , وفيه واحد كان شهر كامل كل ليلة يرسل السيارة تأخذه من البيت وفي تلك الأيام ماكانت المبالغ جيده 30 الف أو 40 الف لليلة مبلغ خيالي وبعد آخر يوم الرجال مسافر خارج البلاد أرسل له ظرف فيه مبلغ 10 آلاف ولو وزعه على الإيقاعيين ما يكفيهم .قال ياولدي انا مبسوط وهو مبسوط أنتهى الإشكال الفلوس ماكانت تهمه فهنا الفرق بين فنانين زمان وفنانين اليوم أقصى حاجة كان يفكر فيها يعمل أغنيتين في السنه وعشان يعمل أغنيتين يحتاج من 2000إلى 5000الآف جنيه مصري كان أهم شيء مصروف البيت كان يروح عند أصحابه يغني في الجلسات عند أحمد صادق والأمير تركي اللي هو المنتظر وكانت هذه الجلسات طلعت من أجمل الأغاني في تلك الفترة الآن الفنان يحفظ التنويت في السماعه گل شيء صار بالسماعه . كلمتك لعشاق صوت الأرض الفنان طلال مداح رحمه الله ؟ بالنسبة لي أعتبر جمهور الوالد أخوان وأخوات أعتز بهم وإستشارتهم وآرائهم وأحاول دائما إني أرضيهم وقتي كله بخصصه من أيام المنتدى من 2002 والوقت كله مخصصه لهم ولإرضائهم وصعب علي أرضيهم كلهم إذا أرضيت منهم 10 في الميه فنعمه الأغلبية ممكن مايحبوني مسأله ثانوية بالنسبة لي أهم شيء ترضي عن الشيء اللي تقدمه وصعب جدا إحنا كقامة فنية كطلال مداح نحيط بكامل مسيرتها مهما كان ..أغلبية الفنانين اللي توفوا من 40 و50 سنة إلى الآن مسيرته الفنية ماتوثقت ميه في الميه في دول التوثيق الفني عندها من البديهيات الأشياء الروتينية عندنا هنا مافيه حكاية التوثيق حتى أحيانا صعب علينا أغنية لحن تبع مين فيه أخطاء لأنه عدة مصادر والمصادر أغلبها شفوية أو تناقلا أو تواترا عن فلان وفلان أن قدمنا مايرضي خير وبركه وإن ماقدمنا إحنا نحاول نقدم الأفضل وأتمنى في كل مناسبة تمر شاركونا في تويتر ولا أحد يرسل على الفيسبوك لأني ما أدخله إلا نادرا . في ختام اللقاء أشكرك أستاذ عبدالله ؟ أولا أشكر صحيفة "التميز" وأشكر سعيد الجدعاني اللي أعطاني الفرصة هذه وأتمنى أكون ضيف خفيف ظل على القراء وكل عام وانتم بخير.
