كان كاتب لغز الاسبوع الماضي الشاعر عبدالهادي فهاد العرجاني من الأفلاج الذي يقول: انشدك عن بنت تجي وسط رجال ولا جات وسطه زادته مقدريه من دونها ما له مع الناس منزال وهي بدونه ما لها قابليه يا ما لها من موقف يشرح البال خصاً ليا صار العلاقه قويه وقد توصل للحل شعرا: اللغز حله ياصلك دون مرسال هاتف شريحه انتشر في البريه انواع لكن سعرها دوم في العال شباب وشياب(ن) شروها سويه احمد ناصر المحرج - الرياض اهلن هلا بك قلت لك كيف الاحوال عبر الخزامي مرسلن لك تحيه بنتك شريحه والرجل قلت جوال وللغز وارد صح ميه اب ميه سعد صنهات السهلي - الدرعية يا مرحبا ترحيبة تشرح البال ولكم يا بن فهاد مني تحية ولغزك شريحة يالسنافي وجوال وفيهم يكلم كل واحد خوية هادي عوض الحربي - قبة يا مرحبا ترحيبةٍ تشرح البال وأخصها لهل الخزاما هديه يالمتصل شريحتك وسط جوال كلم بها مدام فيها شويه صلاح بن عبدالله اليابس - رحيمة هلا يابن فهاد ياطيب الخال وايضا مع الترحيب اغلى تحيه ترا جواب اللغز في وسط جوال شريحة تركب بنفس رضيه علي الرشيد - رياض الخبراء شريحة الجوال ياطيب الفال من دونها الجوال ماراح نيه هذا جواب اللغز ياصلك بالحال والا ان صبرت اسبوع جالك هديه محمد ابو دحيم - البدايع ياللي بنيت اللغز جاوبك حلال ولو كان صعب مايكلف عليه من الجنوب اقبل عرفناه بالحال شريحه الجوال ميه بميه غازي فالح الحربي - رياض الخبراء ياللي طرحت اللغز للغز حلال يامرحبا ياراعي الشاذليه انا عرفت الحل ياطيب الفال شريحة الجوال ميه بميه راكان عبدالرحمن العريني- البدايع الحل واضح ما يبي كثرة جدال وصلة لقارينه كتبه هديه ذيك الشريحه ركبوها بجوال اثنينهم خدمة لنا عالميه عوض لافي الرشيدي - حفر الباطن لغز الاسبوع كتبه للصفحة الشاعر خليف فهيد الحربي ويقول وش هن ثلاث إبكار صفر (ن) على الكيف يا حلوهن يا زينهن بالمكاني خذن لهن ست سنوات مواليف ما يشربن ما يا كلن قحوياني جاهن شجاع وشرد الصفر يا حيف وأقام في مكانهن له زماني نستقبل الحلول عبر الايميل: [email protected] أو الفاكس: 0114871070 كما نرحب بطرح الألغاز الجيدة
