الددسن اللي وقّفت بالمسايير في ديرةٍ قشرا ولا فيه ورشه يا عل سايقها يجيب التباشير ويقفّل الكبوت.. ويشيل فرشه علي محمد الحلافي الموتر الي خاربٍ وشتبيبه ودوّه للورشه يصلّح ويرتاح والا مع السكراب ياخذ نصيبه قلعه ودر عن درب الاجواد ينزاح مشاري الغنام - ثادق الددسن اللي وقّفت حول الاشجار يمكن بلاها يطلع السير مقطوع ولا البساتم عندها الزيت ما سار ولا يكون البلف ضاغط على الكوع علي رشيد الرشيد - رياض الخبراء موتر قرنبع توهم مشترينه ولا زمانه.. ثم ولى مديله قمتوا عليه اليوم وموظبينه وان ما عرفتوا هاتوا سطحه تشيله عبدالرحمن بن منصور التركي - البكيرية عسى العطل ما يصير غامض وخافي بعد التعب واصلاحها من عطلها وتكفون لا تمشون والنور طافي وتفقدوها لا تبنشر عجلها علي آل زولان الفيفي - بيشة تعطلت بادرب ددسن عراوي اثنين بالكبوت ثالث تحتها لا والله اللي ما تفيد الهقاوي اللي تخر الزيت جت سالفتها فهد بن عقيل الطويان - بريدة قبل السفر احرص وخلك فطيني ترى الصيانه مطلبٍ قبل الاعطال كم من نفوس روحوا تايهيني اكشف على الموتر.. احذر الاهمال محمد بن عبدالعزيز الخنيفر - أشيقر يالددسن المبروك وش بك تعطلت في وسط صحرا ما بها ورشة إصلاح لاذقت شاهي.. ولا بعد أفطرت من الصبح ربعي كل واحد بمفتاح خالد بن ناصر المخيمر - روضة سدير لا صرت ما جهزت للبر موترك مشواركم بيصير هم ونكادي بيوردك لقصى المهالك ويترك وما عاد ينفع لو تصيح وتنادي مسلم سعد السهلي - المجمعة لا باس يا سايق النيسان لو كان تازن بلاتينه وقتٍ مضى يوم كان.. وكان فيه الشقا بس يازينه غازي بن قاعد العتيبي- الدوادمي ملوا من التلفاز .. والنت .. والشات تواعدوا فالبر لجل الطرابه تعطّل الموتر ولا فيه ورشات كلٍ بذل جهده يدوّر خرابه سعد الحماد - روضة سدير العلم زين ولو مهنة بسيطة مثل ميكانيكي بورشة مهندس ينفعك يالعطلان فوق البسيطة ويحميك من شر الفقر ما تفلس أحمد نايف العصيمي – الرياض يا أهل الونيت اللي مشيتو مسيان تعطّل الموتر ولا فيه إسعاف ومافاد إصلاحه ولو كنتو أعوان مديله الماضي مضى منه ما طاف حمد بن عبدالله الوايلي - حوطة سدير تعطل الددسن عليهم بذا البر ويصلحه واحد من الي يعرفون وثنين مافي روسهم شي يذكر لو قلت غير بوجياً قال وشلون سعود بن عبدالعزيز الهزاع - نعام وش الحيلة خربت السياره ولاحولنا مهندس يصلحها من بعد المكشات قامت حراره وخلتنا بالبر الله لايسامحها زبن مقبل العنزي - بريدة ركاب ددسن كل واحد مهندس قام وعلى الكبوت فسر كمومه كلٍ فزع رايه وقال متمرس ياما ظبط مور ولو كان كومه عبدالكريم النغيمشي - الربيعية ماهي بعاده يالعراوي تقيفين لكن طلوع البر خيب ضنونه قاموا يحدونه على الميّ .. والطين دايم هل القيلات مايرحمونه مخلف بن سعيد الشمري - الأحساء يستاهل الفزعات وارد عراوي حطّه على يمناك ثم اقضب الدرب وليا تليّش ثمْ طلب من يداوي يكفي ثلاثة عاقل وفاهم وذرب زيد بن ماجد بن مرعيد - الرياض موتر اشوفه طافيٍ بالبراري واللي قديمٍ يكثرن فيه الأعطال قم واتصل ويجيك بالليل ساري رجلٍ تعرفه دون تأخير .. وإهمال محمد الأطرش - القصيم يا فاتح الكبوت.. ويا ماسك السلْك وياللي تدوّر فالعلوم الخفيّة كم واحدٍ من دون تجهيزها هلك يمشي ولا يفحص في هذي.. وذيه فهد الدوسري - عودة سدير لا والله اللي بالعراوي بلشنا وحنا ثلاثه ما عرفنا خرابه والوقت يسرقنا ورانا دبشنا وأن كان ماوصلناه لوا سفابه عبدالمحسن بن محمد الجريسي - الرياض خذ العلم مني انصحك بيع تشليح واشتر جديداً لو كلافه.. وتقسيط خلك مع الموضه.. ولا عاد تصليح ما ينفع الموتر صلاحٍ .. وتربيط سميرة سليمان العبرة - الرياض كل الثلاثه يحوفون المكينه والشاطر اللي ينتهي قبل الاثنين الظاهر الايسر عنده فطينه صارت يدينه بين دمقة وبليتين صنهات علي الحربي - عنيزة صورة العدد تصوير الزميل محمد اليوسفي نستقبل مشاركاتكم الشعرية على الايميل الخاص بصفحة الخزامى : [email protected] أو الفاكس رقم: 4871070 ونرحب بالصور الهادفة والطريفة زاوية (صوت الصورة) .
