طلعوا الجيكة عن راس الخروف افزعوله لا يأكلها مفلفلة زين شكله ذابحينه للضيوف الضيوف أهل الوفا والمرجلة محمد عفار المطيري - عنيزة وين راسك صرت مثل النعام وأنت عارف ويش هي حالتك خير مالك رايحن للعدام والنهاية تستوي طبختك عبدالكريم عبدالرحمن السلوم - القرائن خروفي اللي شريته باغلا الأثماني باغيه للضيف والا المسيّر العاني دخل راسه بسطل واكتم أنفاسه سطل النفيع الذي يعطيه عيلاني خليل التميمي - ثادق أرفق بحال الكبش لا تكون قاسي هذا عمل محظور بالدين والشرع حطيت سطل فوق جسمي وراسي هات الشعير الزين والعشب والزرع عبدالرحمن منصور التركي - البكيرية ياكبش عزي لك على ما حصل لك ياكيف تتنفس وتنظر لقدام أخطا الذي حط الغطا فوق وجهك خالف تعاليم لها حث الإسلام ناصر بن جمعان آل عوض - وادي الدواسر الطلي راسه مصدع ولا هو رايق عارف ان الربع ناوين له بالنية خايف يصورونه.. وهو متضايق ثم تطلع صورته في الخزامى سيه لطيفة بنت محمد العبدالرحمن طلينا ياناس عطشان بالحيل شرب القدر كله وغطى به الراس بين العطش والحر شفنا البهاذيل والجو مغبر تشتكي منه الاجناس خالد بن ناصر المخيمر - روضة سدير حجرتني بالحوش وأعميت عيني قصدك تعذبني ولا ويش طاريك أطلق سراحي قبل ما يذبحوني عيد الضحية توه الله يعافيك عبدالمحسن محمد المحيسن - رياض الخبراء خروفكم يالربع عطشان والرحمة اليوم محدودة شبك وشمس وبها هلكان ولاحدن حواليه ويعوده محمد بن عبدالعزيز الخنيفر - أشيقر حدك عطش مافيه شك ولا ريب جركل فضى من فوق راسك رفعتيه محجورة والصيف يشوي لواهيب حقك على اللي ودعك عند راعيه فهد بن عقيل الطويان - بريدة يالله ترى مليت متى تغبون صدري كتم والعين زغلل بصرها ذا جركل باقي وبالشمس مدفون له عام في حوشي وصافي غبرها عبدالكريم النغيمشي - الربيعية يالله يافارج كروب عظيمة فرج عن المكتوم في حزة الضيق عز الله اللي راح بليا وليمة الموت واحد والمنايا توافيق سعد الحماد - روضة سدير لو تسوي ويش بنطحك بقروني نطحة ورا نطحة ومعها أربع وخمس تصال ولو حطيت جيك وصحوني مثل السحب تكثر ولا غطت الشمس عبدالله بن شمسان البدراني - الرياض الله ولا عيش هذا من أسبابه جينا نبي نعتاش ونشبت قروني الباغة القشرا صارت ضبابة لا عاد به نفس وعميت عيوني فيصل مناحي السويداني - الأحساء الخروف اللي عليه من الجراكل مدري طفاقة والاحده الجوع ما عاد يقدر يشرب ولا ياكل ولا عاد لصوته صدى مسموع خالد سعد السهلي - الدرعية ياهل الشبوك أمهملين بهمكم أمانة برقابكم لاحظوها ارهو لها تروى وتشبع لزمكم خافوا عليها من الخطر واحفظوها صالح عبدالعزيز السويح - روضة سدير يبي الخروج وبس من وين مدى شكله حزين واقف بالحضيرة مير البلا ياخوك راسه مغطى منهو يجيه وينقذه من مصيره خليف الحربي - الرياض مخفياً راسه يبي حبة شعير وسط حوش شبكه طويل وحواجز صادوه في الصورة والشكل غير فكوه يا أهل العرف فكوه عاجز حمد عبدالله الوايلي - حوطة سدير يازول قل لي ليش عني حجبت النور مع الهواء ومع أكسجين وشوف الناس غطيت رأسي واصبحت لأرض بي تدور وأنا لي أكبادٍ وقلبٍ ولي إحساس علي بن معاضه - الرياض يشرب من الماء ثم خشت قرونه في دبة يشرب بها بلاهب الصيف وخشت براسه لين غطت عيونه تقول كمام على رأس حريف سعود بن عبدالعزيز الهزاع - نعام ضامي أبغا الما وأدخلت راسي جركل ضيق ما قدرت منه الخلاصي الحقوني ياهلي أكتم انفاسي موتتي بها الحال ما عنها مناصي عبدالعزيز الماجد - الرياض @ نستقبل مشاركاتكم الشعرية حتى مساء الاثنين على الفاكس رقم 4871070او الايميل الخاص بصفحة الخزامى. [email protected] زاوية (صوت الصورة).. وياهلا.
