البعد قاسي والهوى يذبح الروح والوقت ما له قلب، ما له حبايب يا خافقي مالك من الهمّ مصلوح لا تصطفق بي مع نسيم الهبايب يكفيك يا قلبي مواجيع وجروح كلي بعضها موجعات النوايب خلي تركني من عنا البعد مذبوح فرقاه فرقي تشتعل بي لهايب من يومها والحزن أكبر من البوح والهم يشعث بي ذلول الذهايب تقبل به أنفاس المعاليق وتروح عزي لقلبٍ حاضر فيه غايب معه السنين الموجعة حب ومزوح ومن غيبته ما عاد لي شي طايب غير السهر وآهات عاشق ومجروح ودمعٍ على لاماه دايم صبايب واللي ذبح كلي من الروح للروح إني فقدت أغلى وأعز الحبايب