أبرحل والله العالم وش اللي بداخلي من شوق وابطوي صفحةٍ عيّا زمان الجور يطويها ابرحل تايه بغربة وطن ما لي عليه حقوق وطن وحدوده عيونك ودمعٍ حايرٍ فيها ابرحل دمعةٍ حارت من ادنى الموق لا اقصى الموق خذلها الوقت يوم انه حرمها من هقاويها ابرحل واجمع آلامي وابرقع ثوبي المشقوق وابفهق عن دروب الشك رجلي قبل تمشيها انا ادري ان الزمن قاسي واعرف اني بليا ذوق ونفسي يوم ودعتك رمت في النار رجليها عمر هالحب ما يفنى مدامه في الحشا مخلوق ولو دنيا العنا جارت وورتنا بلاويها ابنسى آه كيف أنسى وانا اللي من زمن محروق اكذّب كانني قلت اقدر انسى بعض ماضيها الا يا حظي المقفي علامك للشقى مطفوق انا طالبك لا تفتح لعيني سدّ واديها ابنسى كيف والذكرى وسط قلبي تسوقه سوق وهذا طيف عاتقها وهذي رجفة يديها انا في ذمة الله ما علي من الشقا والعوق انا في ذمة اللي لا قبض هالروح يحييها جعل عينٍ بكت للحب ابد ما تنحرم من موق ولا تفقد ولو طالت ليالي الهجر غاليها وعينٍ خانت العشرة عساها امر الولي من فوق عساها في زمانٍ دبرته ضاعت خطاويها وابرحل والله العالم وش اللي بداخلي من شوق وبطوي صفحةٍ عيا زمان الجور يطويها
