يا الله يا ذا الفضل يا ذا المغفرة يا ذا الجلال يا معتلي عالعرش من فوق السماء السابعة الحمد لك والشكر لك في كل وقت وكل حال عبدك ويخضع لك من التكليف حتى مصرعه مومن بان الله باقي وان غيره للزوال وان النبي خير البرية ما خسر من يتبعه وان الحياة دروس تغني عن خطاب وعن مقال وان اللبيب اللي حفظ درسه وغيره ضيعه وان القصايد فالمجالس خير من قيلٍ وقال وان الشعر حكمة والافكار الحكيمة تبدعه وان القصيد ليا طلع من وسع فكر وضيق بال اصدق من العبرة على خد اليتيم ومدمعه والهاجس اللي ساقني ما ادري عقل والا.. هبال خلوه يصدح بالحقايق لين كلٍ يسمعه اللي يشك ان الحياة تمر في ثوب الكمال اذا زرع ماهو بحاصد غير شيٍ يزرعه والا الزمن يمضي بنا ما بين ميلٍ واعتدال نعيش فالدنيا ولا ندري وش اللي تصنعه نوبٍ تودينا يمين ..ونوب تاخذنا شمال والعمر رحلة والحياة احلام والناس امتعة والآدمي لو مات يبقى ذكره الطيب مثال على التزامه بالقيم وقت الفتن والزعزعة الله يبارك فالرجال اللي يشيلون الثقال اللي لهم وقفة لو ابواب المنايا مشرعة صحيح ما قال المثل ما للحمول الا الجمال اللي تشيل الحمل ما تنشد عن ابو بردعة واكبر صحيح ان المواقف تكشف اشباه الرجال تكشف لنا الطيب المزيف خلف بيض الاقنعة من تخفي الايام طبعه تفضحه سود الليال تظهر رداه وتكشف الطيب الذي يتصنعه ما حق هذا العينة ياكود سوق ابو ريال ولاهو بشي مستغرب ان عافوهم المتبضعة وانا لو اني احتجتهم ما هوب لنّي شين فال الله كتب يكشف لنا خستهم المتوقعة والحمد للي كاتبٍ لي عنهم اشد الرحال لو ان نفسي عن رداهم دايما مترفعة ومن قال من هم ؟ قلت معروفين ما فيهم جدال ثلاثة اوغاد وتمام العد تلقاه اربعة صفاتهم تغني عن اسماهم بدون انك تسال المنزوي والملتوي والنخولي والامعة الاول اللي يحسب ان المال تاج وراس مال لابوه لابو ماله اللي فالخزاين يجمعه والثاني اللي شوره ورايه براس ام العيال رضا الحليلة آخر آماله وغاية مطمعه والثالث الكذاب ابو وجهين كان ولا يزال هدار مجلس والحصيل حكاه كله جعجعة ورابعهم اللي ما يميز لا حرام ولا حلال يلف ويدور وعلومه كلبوها ضايعة دعهم يخوضوا في بحور الغي واوهام الضلال ما دامني لاهدافهم سددت ضربه موجعة لو لمعوا صورتهم وغطوا رداهم باحتيال لو رابعة تابت عن المحذور تبقى رابعة لكن عرفت ان الرخامة طبع فيهم وانجبال وان النذالة عرق فيهم والردى هم منبعه واللي نخاهم مثل من يتمسك برمث الحبال لا واوجود اللي يبي منهم جميل ومنفعة اقسم برب البيت بأن ام الكحل وام الدلال تسوى مية من ضربهم في ضيق والا في سعة هذا مثل والناس فيهم دون دون وعال عال وكلٍ حسب فعله ووقفاته نحدد موقعه وانا رقيت بفضل رب الكون في روس الطوال وتركت بعض الناس في وحل الدنا متربعة واخذت حقي واعتليت المجد وشربت الزلال وكذبت من قال الزمان ان كان ما طاعك طعه بعض الامور نجيبها بالغصب لو طال المطال اذا نوينا شي من يقدر سوى الله يمنعه نحققه من فوق خشم اللاش لو صعب ومحال وندوس راية كل حاسد هو ومن واقف معه قلت القصيدة من صميم الواقع ولا هي خيال منطوقها يشّر على بعض الخلايق باصبعه واللي تضايق من كلامي او زعل من ما يقال يضرب براسه في حجر قاسي ويمسح مدمعه
