هلت سحاب الخير في كل الأوطان واستبشرت فيه القلوب الملاهيف وغنت طيور الخير تصدح بالألحان والخير عم المدن وأوفى على الريف تنشر خبر عم البلد طيب وإحسان وحل الفرح فيها من السيف للسيف طاب أبو متعب واستوى الشعر وازدان وغدا البلا لعداه سمٍ مزاعيف وطاب الكرم يومه تشافى كحيلان وانباج صدر أهل الوفاء والمواليف وكل الجزيرة عمها الخير ودّان من حدها لأبها إلى البدع وطريف شعبك على شوفتك شفقٍ وولهان حب من الأعماق ما يلحقه زيف ما له على غيبتك صبر وسلوان ولا يهتني بالعيش ويطيب له كيف حتى يشوفك ترفع الكف مشتان مع بسمتك فيها من الهم تخفيف شعبك يحبك حب والحب سلطان وحبك يزيد الشعب قدرٍ وتشريف وبادلتهم حب كما المزن هتان ومديت كف الجود من دون تسويف وأهل الكرم من جود كفك لهم شان وأنتَ تجود ولا تحسّب مصاريف حتى تعديت الأماكن والأزمان واسمك تعلّى فوق روس المشاريف يا فخرنا يا عزنا طير حوران يا بلسم اللي صابه الوقت بالحيف وعلى العداء سمٍ ذحاحٍ ونيران تقص رأس الشر بالحق والسيف على العدو مرٍ مريرٍ وبركان وعلى الصديق أحلى من الميّ بالصيف يا خادم البيتين يا خير ربان للمجد والعليا تحثّ المجاديف يا خادم البيتين للمجد سيسان وأنتَ بنيته حبّ ما هو توليف حتى جرى ذكرك على قلب ولسان معروف ما يحتاج وصفٍ وتعريف وإن كان ظهرك يشتكي بعض الأحيان هذي عزومك حملها فيه تكليف ولا يقدره غيرك ولو كان من كان من رأس أبوك مبدل الميل والهيف اللي ثبت ملكه على عمد وأركان عدلٍ وميزانٍ وحد المراهيف هذي الجزيرة تكتحل لك بالأعيان وللشعب فرحة ما توصّف بتوصيف الله يديمك عز.. ويعز سلمان واخوانك أهل الطيب وأهل المواقيف الشاعر/ علي بن محمد بن فهد العمار - جامعة الإمام محمد بن سعود الإسلامية
