السهر الليل والدمعات وعيون الشقاوي والعنا والهم والحرمان والنفس الحزينه والقمر والشمس والقطبين والنجم السماوي والرعد والبرق والهمّال والسيل ودنينه والوعد والعذر والسجّات وجياع الهقاوي والغلا والصد والأحلام والعمر وسنينه والدفا والبرد وابيات القصايد والغناوي والبيوت الطين وأحلام القراوه بالمدينه كلّها مريتها فيك أنت يا عذب الحراوي عقبها مر الهوى مختال يسفه عاذلينه الهوى ماهو بيوم ويوم ما قلبك هواوي عاشقك لو صَبّ لك دمّه وموَّلك بونينه والله إن يصبر لها قلبٍ على وصلك فداوي دامك أغلى من تربّع في وسط قلبه وعينه حن لي دامي نسيت السيف والبشت الحساوي سرت في وقتي كذا والعمر تقضبني يدينه كيف أبا اقسى وانت حبك ماخذٍ حالي رهاوي وان زعلت ازعل على الهزله ولا أزعل عالسمينه وانت قسمه ما يمد إلا على الكفو الحياوي ما يمد الا على مالطيب ينبع من يمينه لو تكاثرتك حمدت الله واعتقت الدعاوي اشكره واستغفره وامد حبلي واستعينه لأنّك أغلى من غلا اللي بيننا دم وعزاوي شفتك أقرب من قريبٍ حال ما بيني وبينه الزمن والنّاس والهراج وكبار الحكاوي جيت وأمليت الفراغ وصرت للخاطر ضنينه لو سمحت اظهر لهم خل الذي زرعه سناوي لين شافك يدري إن الماء على زرعه غبينه بس أنا لي حاجةٍ تنعد من ضمن الرجاوي لا تطرّي لي السفر.. طاري السفر ديني ودينه لو سمحت تغيّر الموضوع لعيون الشقاوي والسهر والليل والدمعات والنفس الحزينه - الشاعر/ علي بن حمري
