يا صابغ اللحية لجل تخفي الشيب=الشيب واضح فيك مهما تخفيه مما توقف له بكل الاساليب=ما تقدر تخفي بوجهك مواريه شيب الرجل من دون شك لا ريب=ما فيه دكتور بطبه يداويه وليا صبغته صار في وضع مريب=وعليك تلقى من الخلايق مشاريه تشوف في دقنك بعاض العذاريب=سود مقاديمه وبيض تواليه واذا تبي نصيحة وراي مصيب=وكل على ما قيل رايه يفديه خله كذا يا راعي الجود والطيب=يزيدك جمال وهيبة في مباديه الشيب بوجيه النشاما ما هو عيب=وقار للي وافيات معانيه وجاحة بالعقل من غير تكذيب=وتقدير للي بالشهامه يوفيه راع الوفا والطيب جزل التراحيب=كساب كلمة والنعم عند طاريه صقر الصقور معكّفات المخاليب=اللي ليا من قال له قول يحميه هذا بياض الوجه يا اهل المواجيب=دلايله بالرجل بيض نواصيه وهذي نتايج معضلات التجاريب=للي تقصّر بالرجل عن هقاويه يلقى بها الرجال بعض المصاعيب=ويشيب راسه ما تحقق مناويه يدربه وقته كل تدريب=قاسي صنوف الدهر مره وحاليه ونذير للمخلوق من عالم الغيب=بإن الصبا قفى وفاتت لياليه مرت سنين العمر من غير تحسيب=والموت قرّب واستحزت حراويه تم الكلام اللي نظمته بترتيب=وجهة نظر لاهل الجمايل وتوجيه وصلاة ربي عد خط المكاتيب=على رسول حقق الله مساعيه
